Posted on: March 23rd, 2017
Mkurugenzi Mtendaji wa Halmashauri ya Wilaya ya Ukerewe Frank S. Bahati amefanya ziara ya ukaguzi wa ujenzi wa vyoo katika shule zilizokuwa zimefungwa na kuwasihi wananchi kuwa sehemu ya maendeleo ya elimu katika wilaya ya Ukerewe. Alikutana na Serikali ya kijiji na kamati za shule.
Alitembelea shule tatu ambazo zinaendelea na ukamilishaji wa ujenzi vyoo ambazo ni Shule ya msingi Musozi, shule ya msingi Muhande, na shule ya msingi Malegea. Ujenzi wa vyoo upo katika hatua mbalimbali za kuridhisha ukilinganisha hali iliyokuwepo awali. Shule ya Msingi Musozi iliyopo kata ya Bukindo ujenzi ukikamilika kitakua ma matundu 14 ambapo kimegharimu shilingi 4,425,000/- ambapo fedha za wananchi ni shilingi 776,000/-, Shule ya Msingi Muhande iliyopo kata ya Murutunguru inatarajia kukamilisha matundu 16, Shule ya Msingi ya Malegea iliyopo kata ya Namagondo imekamilisha ujenzi wa matundu zaidi ya 16.
Ametoa agizo kwa Idara ya Elimu Msingi kuwa shule zote zilizofungwa walimu waandae na waanze masomo ya ziada kwa kipindi cha likizo hasa madarasa ya mitihani hii itawasaidia wanafunzi kusoma na kufidia muda uliopotea shule zilipokuwa zimefungwa. Pia amewataka Idara ya Elimu Msingi kufanya uchambuzi wa maeneo yote yenye uhitaji wa kuanzisha shule nyingine ili kukabiliana na wingi wa wanafunzi katika baadhi ya shule.
Bahati amewataka wananchi kuwa wazalendo na kushiriki katika shughuli mbalimbali za maendeleo na kuachana na itikadi tofauti za watu bali kujihusisha na mabadiliko ya elimu Wilayani. Shule zikiwa na upungufu wa miundombinu rafiki na muhimu kwa wanafunzi itawaweka mahali pabaya watoto hivyo jamii ijihusishe na kuwasaidia wanafunzi ili waweze kufanya vizuri katika mitihani yao.“Jukumu la kuleta maendeleo ya shule na elimu kiujumla sio la Serikali pekee bali ni letu wote, kila mmoja awe chachu ya mabadiliko”, alisema Bahati. Wanafunzi wote wanaendelea na masomo na ukamilishaji wa ujenzi wa vyoo katika shule 11 zilizokua zimefungwa unaendelea.
Mkurugenzi Mtendaji wa Halmashauri ya Wilaya ya Ukerewe Frank S. Bahati pamoja na baadhi ya watumishi wa Halmashauri wameshiriki ujenzi wa choo katika Shule ya Msingi Muhande kwa kubeba matofali, mawe na kuchimba msingi vya vyoo hivyo pamoja na wananchi wa Muhande.
Mkurugenzi Mtendaji wa Halmashauri ya Wilaya ya Ukerewe Frank S. Bahati akikagua choo cha Shule ya Msingi Malegea.
Wananchi na wazazi wakishiriki katika ujenzi wa choo cha Shule ya Msingi Muhande.
